Rima di l’alta surgente
Puema dedicatu à l’Impruvisatore Intoniu Leonì, « u Maggiurellu », u me ziu per appiccicaticciu.
In mé sentu a cuntentezza chì corre
Quandu ch’ellu cante l’Impruvisatore
Incantevule hè a so chjara voce
Ralegre pettu di chjarasgiu è noce
U ghjattu é u topu sò fratelli
A volpe face pace cù l’agnelli
In u fiume e truite sò in ballu
Quassù cantenu ghjalline è ghjallu
Tantu peghju! Sta sera mi ritardu
A’ a so diritta vogliu stà calatu
Lacaraghju penseri è aratu
Per stà à sente stu cantu beatu
Rima di l’alta surgente
Tù ghjunghji da u luntanu
Sì dolce è sì putente
O figliula d’u Supranu
Senza mai facci scimisce
U tu versu rimbivisce
Pé tè purtador’ d’amore
Ringraziu u me Signore
In mè sentu u core chì si move
Quandu ch’ellu stà à sente rime bone
Maravigliosa hè sta voce latina
Hè schietta, linda, pura è cristallina
A Bellula dorme cù e ghjalline
E ghjumente ballenu cù e vaccine
Ghjente sumerine saltichjeghjenu
I Puliticanti s’imbracciacheghjenu
Tantu peghju! Sta sera mi ritardu
A’ a so diritta vogliu stà calatu
Lacaraghju i penseri è l’aratu
Pè stà à sente stu bell’cantu beatu
Quale hè l’Autore di sti rigali
Diu è Ghjesù ùn devimu nigalli
Mi rendu contu ch'è vo state zittu
In Intendimentu ùn site fittu
Ancu s’è vo ùn credite curatu
Parolla è Cantu Diu ci hà datu
Ellu deve esse santificatu
Prestu u mondu sarà rinnuvatu
Da Messia chì ci hà riscattatu
Ancu più bellu vostru verbu sarà
Pè u sempre Pilutò ùn canterà
Iè, in a Morte Eterna ghjacerà
Eiu, carissimu ziu ùn vi addestru
Un’ pretendu esse vostru maestru
Ma predicheghju a Parolla Santa
A vechja umanità sarà franta
Troppu maiò sò tutte e malfatte
Mai in pace; ella sempre cumbatte
L’omu hè andatu troppu luntanu
Si hè lasciatu cunduce da Furdanu
Da Cristu i conti saranu fatti
Nasceranu corri corri è salti
Averà forse pietà di i matti
Ma i Scellerati smarisceranu
A’ nisunu mai più disturberanu
Per avà, ùn vogliu più parlà, piantu
Affinchè vo ripigliite u cantu
JMB